BAB IV
PARHALADO DI HURIA
1. Pangantusion
Parhalado i ma ruas ni huria na tarjou jala tarpillit mamelehon diri laho manghobasi ulaon di tongatonga ni huria.
2. Ragamna
2.1. Parhalado partohonan i ma Pandita, Guru Huria, Bibelvrouw, Diakones, evangelis dohot Sintua.
2.2. Parhalado na so partohonan i ma angka pengurus ni badan, yayasan, dewan, seksi, guru sikkola minggu, organis, dirgent koor, panitia.
2.3. Parhalado na gok tingki i ma angka parhalado na mamelehon sude tingkina dohot gogona mangula di huria, jala na manjalo balanjo na gok sian huria i.
2.4. Parhalado na so gok tingki i ma angka parhalado na mamelehon dirina mangula di huria i marhite na pabahirhon tingkina dohot gogona, jala ndang manjalo balanjo sian huria i.
2.5. Parhalado na sukarela i ma angka na mamelehon dirina mangula di huria hombar tu tingkina dohot gogona secara sukarela, jala ndang manjalo balanjo sian huria.
3. Uluan ni Huria
3.1. Pandita Ressort do uluan ni huria sabungan, uluan ni huria do na manguluhon huria pagaran marsadasada.
3.2. Ulaon ni Uluan ni Huria
a. Manguluhon huria marsadasada, sumangkapi dohot pasauthon angka ulaon panghobasion hombar tu sitolu panjouon ni huria.
b. Manguluhon parhalado na gok tingki hombar tu parsagi ni ulaonna be.
c. Manguluhon rapot huria, rapot parhalado, rapot parhalado partohonan dohot rapot pamilliton ni angka pengurus ni dewan, seksi dohot panitia pembangunan.
d. Patulushon na pinutushon ni Sinode Godang, Majelis Pekerja Sinode, Sinode Distrik, Majelis Pekerja Sinode Distrik, Rapot Ressort, Rapot Parhalado Ressort, Rapot Huria, dohot Rapot Parhalado Partohonan.
e. Mangaramoti, manogunogu dohot pahinsathon mutu ni panghobasion di parartaon dohot adminstrasi ni huria i.
f. Manjalo laporan pertanggungjawaban ni ganup dewan.
g. Pasahathon laporan taringot tu pangulaon, statistik dohot keuangan ni huria tu Pandita Ressort dohot tu rapot huria.
4. Parhalado Parartaon
4.1. Pangantusion
Parhalado parartaon i ma manang na piga parhalado partohonan mangurupi uluan ni huria laho mangaradoti arta dohot adminstrasi ni huria.
4.2. Ulaonna
a. Mangurupi uluan ni huria mangarangrangi rencana kerja dohot anggaran belanja huria dohot parartaon ni huria siboanonna tu rapot parhalado partohonan.
b. Mangaradoti adminstrasi ni huria na manghamham adminstrasi umum, sarana dohot prasarana.
c. Patupahon sarana dohot prasarana hombar tu program kerja dohot anggaran huria.
d. Mangatur sude arta ni huria laho parentahon pamangkena, hapeahanna dohot pangaramotionna.
e. Manontuhon angka arta na so boi pangkeon be hombar tu hatontuan siboanonna tu rapot parhalado partohonan asa dihatai jala ditotophon.
f. Patupahon laporan parture ni arta dohot adminstrasi ni huria sipasahatonna tu uluan ni huria hombar tu tingki na ditontuhon.
4.3. Ruasna
a. Dua manang opat halak sian tongatonga ni sintua na pinillit ni rapot parhalado partohonan.
b. Bendahara Huria.
4.4. Uluanna
I ma sahalak sian ruas ni parhalado parartaon na pinillit nasida sian tongatonga nasida.
4.5. Syarat gabe Parhalado Parartaon
a. Ruas na so bendahara huria:
1. Na ringgas mangulahon hasintuaonna, so hasurahan pangalahona.
2. Naung manjalo tohonan na umotikna 3 (tolu) taon.
3. Saboiboina pendidikan sekolah lanjutan tingkat atas, mangantusi adminstrasi dohot manajemen parartaon.
4. Na umotikna marumur 28 taon, jala satimbotimbona 61 taon hatiha mamungka ulaonna.
b. Bendahara Huria
4.6. Periode
Periodena opat taon, jala boi dua periode padodot.
4.7. Maradian
a. Sidung periodena.
b. Mangido maradian andorang so sidung periodena.
c. Hona Ruhut Parmahanion Paminsangon HKBP dohot na so sintong mangulahon ulaonna mangihuthon panimbangion ni rapot parhalado partohonan.
d. Pinda huria.
e. Monding.
5. Bendahara Huria
5.1. Ulaonna
a. Papunguhon, mangetong, manimpan sude hepeng ni huria na marharoroan sian ulaon na marragam i di huria.
b. Manggarar marhite hepeng huria sude nasa haporluan ni ulaon na marragam i di huria marguru tu haputusan ni rapot parhalado partohonan jala ditolopi uluan ni huria.
c. Patupahon barita parhepengon ni huria marhite tingting manang boaboa na tarsurat, stensilan manang cetakan ganup minggu, ganup bulan, ganup triwulan, manang ganup semester.
d. Manimpan hepeng huria di bank manang di kantor pos na jumonok,, asing ma sipangkeon ganup ari, boi ma disimpan di brankas hombar tu haputusan ni parhalado partohonan.
e. Manongos nasa hepeng na patut pasahaton tu resort, distrik, dohot hatopan HKBP, jala ditolopi uluan ni huria.
f. Mangatur nasa hepeng ni huria marhite pembukuan ni hepeng na masuk dohot na haruar. Rajuman do songon wakil bendahara huria sude bendahara ni dewan dohot seksi na maniop kas na metmet.
g. Mangalehon partanggunganjawaban tu uluan ni huria dohot tu rapot parhalado partohonan.
5.2. Syarat gabe Bendahara Huria
a. Sintua manang ruas na boi gabe juara bagas haposan na pinillit ni rapot parhalado partohonan.
b. Na ringgas mangula ulaonna, so hasurahan pangalahona.
c. Saboiboina pendidikan sekolah lanjutan tingkat atas, jala mangantusi manejemen parhepengon, lumobi akuntasi.
d. Na umotikna marumur 28 taon, jala satimbotimbona 61 taon hatiha mamungka periodena.
5.3. Periodena
Periodena opat taon jala boi dua periode padodot.
5.4. Maradian
a. Sidung periodena.
b. Mangido maradian andorang so sidung periodena.
c. Hona Ruhut Parmahanion Paminsangon HKBP dohot na so sintong mangulahon ulaonna mangihuthon panimbangion rapot parhalado partohonan.
d. Pinda huria.
e. Monding.
“Ia haposan halak di na ummotik, haposan ma ibana nang
di na godang; Ianggo geduk ibana di na ummotik,
geduk ma nang di na godang”
Lukas 16 : 10
Tidak ada komentar:
Posting Komentar